05:43 05 Бештин айы 2021
Түз эфир
  • USD84.7946
  • EUR95.7543
  • RUB1.1499
Маданият

Усубалиевдердин төрт мууну: Турдакун, Есенкул, Эсен, Таир-Кемаль. Таберик сүрөт

Кыскача шилтеме алуу
"Таберик сүрөт" — сейрек кездешкен ирмемдер (166)
631 0 0
Кыргыз Республикасынын баатыры Турдакун Усубалиев, уулу Есентур, небереси Эсен жана чөбөрөсү Таир-Кемалдын сүрөтү, 2010-жылы, Бишкек шаарында
© Фото / Общественный фонд имени Турдакуна Усубалиева

Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, тарыхын баяндайт.

Кыргыз Республикасынын баатыры Турдакун Усубалиев, уулу Есенкул, небереси Эсен жана чөбөрөсү Таир-Кемалдын сүрөтү 2010-жылы Бишкек шаарында тартылган.

Көрүнүктүү мамлекеттик ишмердин небереси, тарых илимдеринин кандидаты Эсен Усубалиев ал учурду мындайча эскерет:

"Биздин үй-бүлө үчүн баалуу болгон бул сүрөт уулум бир жашка чыгып туулган күнүн белгилегенде тартылган. Ал күнү чоң атамдын маанайы жакшы болуп, чөбөрөсүн колунан түшүрбөй көтөргөн. Чоң атам менен чоң энем эки уул, бир кызды тарбиялап өстүрдү. Ал киши билим алууну баарынан жогору коюп, жашоодо адам ар дайым жаңы маалыматтарды алып, бир нерсени окуп, изденип жүрүш керек дечү. Өзү да көп окуп, изилдеп жүрчү жана бизди да ошого көндүрдү. Неберелерине талапты катуу койчу. Ошол эле маалда биздин сөзүбүздү көңүл буруп угуп, жетишкендик, ийгиликтерибизди сурап, жашоого керектүү кеп-кеңештерин айтып турчу. Мисалы, мен Москва мамлекеттик эл аралык мамилелер университетинде окуп жүргөндө экөөбүз мамлекет жана саясат жөнүндө көп баарлаштык. Ушундай мүмкүнчүлүк берген тагдырыма ыразымын", — деди Усубалиев.

Ал ошондой эле чоң атасы Кыргызстан Коммунисттик партиясынын Борбордук комитетинин биринчи катчысы болуп иштеп турган жылдары аны чанда гана көргөнүнү айтат.

"Өмүрүн элге кызмат кылууга арнаган адам жашоосундагы көп нерсени садага чабууга аргасыз экен. Чоң атамдын ишинин көптүгүнөн үй-бүлөсүнө, жакындарына көп убакыт бөлө алчу эмес. Республиканын башында турган чоң атабызды үйдө эртең менен эле көрчүбүз. Кээде эмгек эргүүсүн алганда, дем алыш күндөрү чогуу болуп калчубуз. Бул күндөрү ал балдары, неберелерине менен болууга аракет кылчу. Мындай мүмкүнчүлүк бизден үй-бүлө үчүн бакыт эле", — деп кошумчалады ал.

Турдакун Усубалиевдин тун уулу Сыргак узак жылдар бою Кара-Балта тоо-кен комбинатынын профсоюзун жетектеп, кийин ишкерлик менен алектенген. Кызы Бермет Гапар Айтиев атындагы Кыргыз улуттук көркөм өнөр музейинде, Улуттук банкта эмгектенсе, кичүү уулу Эсенкул мугалимдикти аркалаган.

Мамлекеттик ишмер 1985-жылы пенсияга чыгып, өлкө көз карандысыз болгондон кийин Жогорку Кеңешке эки жолу депутат болуп шайланып, 1999-жылы "Ак шумкар" өзгөчө белгисин алып, көзү тирүүсүндө жети небересин, жети чөбөрөсүн тең көргөн.

Эске сала кетсек, Турдакун Усубалиев 1961-жылы Исхак Раззаков кызматынан алынгандан кийин 1985-жылга чейин Кыргызстан Коммунисттик партиясынын Борбордук комитетинин биринчи катчысы болуп, Кыргыз ССРинин башында турган. Бул убакыт аралыгында республика аймагында бир топ ишкана, ГЭС, аэропорт, маданият, билим берүү жайларын куруп, Фрунзе шаарында филармония, Тарых музейи, "Ала-Тоо" аянты, "Жеңиш" аянты, борбордогу жер өтмөктөр ишке берилип, Усубалиевди шаардыктар "биздин прораб" деп атап коюшчу.

КРдин Баатыры 2015-жылы 6-сентябрда узакка созулган оорудан улам көз жумган.

Тема:
"Таберик сүрөт" — сейрек кездешкен ирмемдер (166)

Тема боюнча

Чыгармачылык оргуштап турган ирмем... Океев менен Байжиевдин таберик сүрөтү
Кыргыз киносуна жол салган Мелис Убукеев менен Кадыржан Кыдыралиев. Таберик сүрөт
Кызгалдак талаасындагы Касымалиева менен Одуракаев. 30 жыл мурунку таберик сүрөт
Белгилер:
мамлекеттик ишмер, Турдакун Усубалиев, үй-бүлө, небере, сүрөт

Дагы инфографика

ЭҢ МААНИЛҮҮ