БИШКЕК, 11-апр. — Sputnik. Кыргызстандык бийчилер Артем Семеренко менен Валерия Качалко Италиядагы эл аралык турнирде үчүнчү орунду камсыз кылышты. Бул тууралуу өлкөнүн Бий спортунун федерациясы кабарлады.
Ишемби күнү, 8-апрелде Италияда жыл сайын өтүүчү спорттук жана бал бийи боюнча "WDSF International Open taken place in Olbia-2017" эл аралык турнир уюштурулган. Ага жалпы 17 өлкөдөн 94 спортчу катышкан.
"Кыргызстандын бийчилери эң сонун көрсөткүчкө жетишти. "Чоңдордун латинасы" категориясында биздин бийчилер Артем Семеренко жана Валерия Качалко Испания жана италиялыктарга гана утулуп калып, коло медалга ээ болушту", — деди федерация өкүлдөрү.
Былтыркы жылы аталган турнирде Семеренко жана Качалко күмүш медаль жеңишкен.
WDSF — Бүткүл дүйнөлүк бий спорту федерациясынын башкы ассамблеясы. Ар жылы WDSF уюштурган эл аралык мелдештерге дүйнө жүзүнөн 200дөн ашык спортчу катышат.
