БИШКЕК, 12-апр.—Sputnik. Режиссер Дальмира Тилепбергенованын "Асман алдында" тасмасы Андрей Тарковский атындагы X эл аралык "Зеркало" сынагына катышат. Бул тууралуу "Айтыш-фильм" киностудиясынын маалымат катчысы Чолпон Идрисова билдирди.
Кинофестиваль жыл сайын Россиянын Ивановск облусунда өткөрүлүп келет. Быйыл 14-19-июнь аралыгында өтүүсү пландалып жатканы белгиленүүдө.
Аталган сынакта калыстар тобу "мыкты тасма", "мыкты режиссерлук иш" номинациялары боюнча тандоо жүргүзөт. Ал эми өзгөчөлөнгөн тасмаларга атайын белектер ыйгарылат.
Кинофестиваль Россиянын өкмөтү, Маданият министрлигинин колдоосу менен өткөрүлгөнү жатат. Анын негизги максаты маданият жаатында тажрыйба алмашуу жана кинематографисттер ортосундагы кызматташууну күчөтүү болуп эсептелет.
Башкы ролдорду Жамал Сейдакматова, Таалайкан Абазова, Анвар Осмоналиев, Нуржигит Канаев, Мунара Дооронбекова, Асан Амановдор ойногон.
Тасманын эл аралык премьерасы август айында Канаданын Монреаль шаарында өтүп, толук метраждуу дебют картинасы номинациясында атайын сыйлыкка татыган.
"Асман алдында" тасмасы февралдын башында Индиянын Бангалор шаарында өткөн VIII Эл аралык кинофестивалга катышып, Азия тасмаларынын сынагында мыкты аталган.
