БИШКЕК, 9-окт. — Sputnik. Султан Раевдин "Жан жаза" романынын бет ачары эл аралык адабият жана китеп фестивалынын алкагында Лондон шаарында болот. Бул тууралуу уюштуруучулар билдирди.
Аталган фестиваль 6-9-ноябрь күндөрү Лондондо өтөт. Бул маданий иш чара Борбор Азия аймагындагы адабиятты жайылтуу жана жергиликтүү авторлорду чет жакта таанытууну көздөйт.
Фестивалдан алкагында кыргызстандык жазуучусу Султан Раевдин "Жан жаза" романынын бет ачары да болот. Ал британиялык Hertfordshire Press басма үйү тарабынан басылып чыккан.
Китептин бет ачаарынын алкагында автордун чыгармачылыгы талкууланып, жазуучулар, адабият сынчылары жана басма үйлөрүнүн өкүлдөрү өз пикирлерин билдирет. Ошондой эле Султан Раев Кембридж университетинде "Борбор Азиядагы заманбап адабият процесси жөнүндө" лекция окуйт.
Фестивалга конок катары Улуу Британиядан (Дэвид Перри, Ник Рован, Хамид Исмайлов, Роберт Вайт, Фариде Хият), Австралиядан (Пол Уилсон), Казакстандан (Кайрат Закирьянов, Елена Безрукова, Мухтар Шаханов), Шотландиядан (Шахсанем Мюррей), Канададан (Максим Корсаков) жана башка мамлекеттерден жазуучулар келет.
