БИШКЕК, 21-июл. — Sputnik. Казакстандык белгилүү фигурист Денис Тенди өлтүрүүгө шектелип жаткан 24 жаштагы Нуралы Киясов камакка алынды. Бул тууралуу Sputnik Казакстан агенттиги жазды.
Жума күнү кечке жуук Алмалы райондук соту шектүүнүн бөгөт чарасын кароо үчүн жыйын өткөргөн.
Шектүү сотто балдары менен туруктуу иши жок экенин, мурда соттолгонун билдирген. Ал 2015-жылы унаа уурдаганы үчүн жазаланган.
Судья Алма Абдухалыкова Киясовго сөз бергенде ал фигуристти бычактабаганын билдирген.
"Мен ал адамды бычак менен сайган жокмун. Мен болгону карап турдум", — деди шектүү.
Sputnik Казакстан агенттигинин кабарчысы жеринен билдиргендей, шектүү эмоцияга алдырбай жай сүйлөгөн. Андан кийин судья кеңешүү бөлмөсүнө кеткен.
Эске салсак, белгилүү фигурист 19-июлда киши колдуу болгон. Денис Тен унаасынын капталындагы күзгүлөрүн чечип жаткан эки ууруну көрүп, кафеден чуркап чыккан. Аларга каршылык көрсөтүүгө аракет жасаганда, кылмышкерлердин колунан бычак жеген. Кийин ооруканага жеткирилип, ошол жактан жан берген. Каргашалуу окуя 19-июль күнү болду.
Таланттуу фигурист болгону 25 жашта эле. Окуяга шектелген эки жаран тең полициянын колуна түшүрүлдү.
Денис Тен VII кышкы Азия оюндарынын жеңүүчүсү жана көптөгөн эл аралык сынактарда байгелүү орундарды ээлеген. 2014-жылы Олимпиада оюндарында коло медалдын ээси болгон. Казакстандын беш жолку чемпиону.
