БИШКЕК, 5-сен. — Sputnik. Казакстандын президенти Нурсултан Назарбаевдин небереси Айсултан башына мүшкүл иш түшкөн учурда баңгизатын колдонгонун моюндаганын Sputnik Казакстан агенттиги жазып чыкты.
Айсултан Назарбаев социалдык тармакка чоң атасы, академик Мухтар Алиевдин өлүмү жана Австриянын түрмөсүндө атасы Рахат Алиев өзүнүн жанын кыйганда абдан кыйналганын жазып чыккан.
"Бакытка бөлөнгөн деп кеп кылынган жаш Айсултан жер планетасындагы эң бактысыз адам. Мындай учурда жан дүйнөңдү өрттөп жаткан ооруну сезбеш үчүн колдон, буттан айрылууга да даяр болуп каласың", — деп Айсултан билдирген.
Ал жашоонун оор сыноосу учурунда үй-бүлөсү, айрыкча таятасы Нурсултан Назарбаев өзгөчө колдоо көрсөткөнүн белгилеген.
"Өлкө президенти күндүз 17 миллион адамдын көйгөйүн чечсе, кечинде небересине көңүлүн бурчу. Ошол учурда ал канчалаган энергиясын, ден соолугун, күчүн мага жумшаганын сезбегендиктен баңги затын колдондум", — деп Айсултан жазган.
Ал ошондой эле баңгилик коомчулук үчүн социалдык көйгөй болсо, адам үчүн кадимки оору экенин моюндаган.
"Алгач көйгөйлөр жоголуп, жашоо кереметтей сезилип, бардыгы алдыда деп ойлойсуң. Бирок бул башталышында гана. Баңги денени ууландырып, ар кандай ооруларды пайда кылат. Өтө эле берилип кеткендер жаш курагында көз жумат", — деди Айсултан.
Анын айтымында, алгач ал кесиптештери, үй-бүлөсү жана элдин пикиринен корккон. Бирок эң алгач таятасына айтууну чечкен.
Ал Нурсултан Назарбаевдин алдында милдеткер экенин айтып, учурда үй-бүлөсүнүн курчоосунда бактылуу экенин белгилеген. Ошондой эле келечекте баңги заты менен күрөшүү боюнча кайрымдуулук фондусун ачууну көздөп жатканын кошумчалаган.
