БИШКЕК, 11-июл. — Sputnik. Казакстандык интернет колдонуучулар баланын мектеп босогосун аттагандыгына арналган той тууралуу кызуу талкууга түшүп жатканын Tengrinews.kz басылма Казакстандын айыл чарба министринин мурдагы орун басары Марат Толибаевдин постуна шилтеме жасап билдирди.
Анын айтымында, чет өлкөдө жашаган таанышы жакында эле өзүнүн кичи мекени болгон облустардын бирине барып, өзгөчө тойго күбө болгон.
"Туугандары баласынын мектепке барганын майрамдашыптыр. Карап турсаң, үлпөт той же маараке деле эмес, болгону бала мектеп босогосун аттаптыр. Бирок муну ата-энеси болуп көрбөгөндөй шоуго айландырып ийиптир. Көптөн бери чет өлкөдө жашаган менин таанышым аны көрүп алып шок болуптур. Тойканада уюштурулган бул иш-чарага жүздөгөн коноктор чакырылган", — деп жазган Толибаев.
Ошондой эле тойдун күнөөкөрүн "алтын чапан" кийген жоокерлер "алтын тактыга" көтөрүп чыкканы айтылат. Коноктор болсо анын үстүнө роза гүлүн чачып тосуп алган.
Бул пост жарыяланганына бир сутка өтө электе 1,5 миңден ашык "лайк" алып, жүздөгөн адамдар талкууга түштү. Айрымдары баланын ата-энесин сынга алса, дагы башкалары бирөөнүн жеке иштерине кийгигишпөөгө чакырды.
