БИШКЕК, 9-окт. — Sputnik. Баткен облусунун түзүлгөндүгүнүн 25 жылдыгына карата эмне иш-чаралар пландалганын өкүлчүлүктөн билдиришти.
Маалыматка ылайык, маараке үч күнгө созулуп, бул убакытта ар кандай маданий, экономикалык жана илимий иш-чаралар өтөт.
Пландалган иш-чаралардын тизмеси:
12-октябрда саат 9:30да Апаз Жайнаков атындагы Баткен облустук музыкалык-драма театрынын алдында ишкерлердин жана бизнес-өнөктөштөрдүн көргөзмө-жарманкеси башталат;
саат 10:30да "Баткендин өнүгүүсү — өлкөнүн өнүгүүсү" аталышында эл аралык инвестициялык форум өтөт;
13-октябрда 9:30да Апаз Жайнаков атындагы музыкалык-драма театрынын алдында Баткен облусунун аймагындагы жогорку окуу жайларынын жетишкендиктери жөнүндө көргөзмө өтөт;
10:00дө Апаз Жайнаков атындагы музыкалык-драма театрында илимий-практикалык конференция болот;
10:00дө Баткен шаарындагы борбордук стадиондо улуттук классикалык кыргыз күрөшү боюнча мелдеш башталат. Баш байге — автоунаа;
15:00дө борбордук стадиондо боз үйлөрдүн, улуттук кол өнөрчүлүк жана улуттук тамак-аш көргөзмөсү уюштурулат;
17:00дө борбордук стадиондо майрамдын салтанаттуу бөлүгү башталат. Анын алкагында театрлаштырылган көрүнүш, жетекчилердин расмий куттуктоосу, эстрада жылдыздарынын катышуусундагы гала-концерт, майрамдык салют болот.
14-октябрда Баткен облусунун 25 жылдыгына карата жер-жерлерде 25 объектинин ачылуу аземи өтөт.