БИШКЕК, 14-июн. — Sputnik. Чагылган тийген адамды жердеги муздак топуракка көмүү керек дегендик — жаңылыш ой. Бул тууралуу Коомдук саламаттык сактоо улуттук институтунун директору, медицина илимдеринин доктору Жаркынбек Касымбеков Sputnik Кыргызстан агенттигине билдирди.
"Андан эч пайда жок. Чагылган тийген адамдан ток 1 секундга жетпей эле чыгып кетет. Андыктан чагылган тийген адамга коркпой эле жолой берсе болот", — деди Касымбеков.
Адистин айтымында, адамдын каза болушуна токтун 5000 вольту эле жетиштүү. Ал эми чагылганда 1 миллиард вольт болот.
Касымбеков адамга чагылган тийген учурда дароо Тез жардам кызматына кабарлоо керектигин, дарыгерлер келгиче төмөнкүдөй биринчи жардам көрсөтсө болорун айтты:
алгач адамды нымдалган шейшеп же чүпүрөк менен орой коюш керек. Ал эми талаада болсо кийимин чечип, муздак суу чачып денесин муздатканга аракет кылса да болот;
андан соң чалкасынан түз жаткырып жүрөгүнө массаж, жасалма дем алдыруу сыяктуу кадимки алгачкы жардамды көрсөтүү зарыл.
"Эгер чагылгандын нуру өмүргө өтө маанилүү делген жүрөк, жүлүн, мээ сыяктуу органдарга тийсе, анда адам мүрт кетет. Статистика боюнча, 10 адамга чагылган тийсе, тогузу аман калат", — деди дарыгер.