БИШКЕК, 3-июн. — Sputnik. Грузия парламентинин спикери Шалва Папуашвили чет элдик агенттер боюнча чуулгандуу мыйзамга кол коюп, документ күчүнө кирди. Бул тууралуу РИА Новости жазды.
Буга чейин өлкөнүн президенти Саломе Зурабишвили аталган мыйзамга кол коюудан баш тартып койгон. Эреже боюнча, өлкө башчы кол койбосо, спикер бул милдетти аткара алат.
"Мен тышкы таасирдин ачыктыгы жөнүндөгү мыйзамга кол койдум", — деди спикер брифингде.
Папуашвили Грузиянын Юстиция министрлиги 60 күндүн ичинде чет элдик күчтөрдүн кызыкчылыктарын үгүттөгөн уюмдар үчүн портал иштеп чыгарын айтты. Андан соң чет өлкөдөн каржыланган бейөкмөт уюмдар жана массалык маалымат каражаттары 2023-жыл үчүн каттоодон өтүп, декларация толтурууга милдеттүү.
28-майда грузин парламенти жети саатка созулган талкуудан кийин президент Зурабишвилинин чет элдик агенттер жөнүндөгү мыйзамга койгон ветосун аттап өтүп, аны баштапкы редакциясында кабыл алган. 84 депутат колдоп, төртөө "каршы" добуш берген.
Грузиядагы чет элдик агенттер жөнүндө мыйзам
Май айынын ортосунда өлкөнүн парламенти "Грузин кыялы" тарабынан сунушталган "Чет элдик таасирдин ачыктыгы жөнүндө" мыйзам долбоорун үчүнчү жана акыркы окууда кабыл алган. Ал кирешесинин 20 пайыздан ашыгы чет өлкөдөн келген коммерциялык эмес юридикалык жактарды жана ЖМКларды каттоону камтыйт.
Мындан тышкары, "чет элдик күчтөрдүн кызыкчылыгын жактаган" бардык уюмдар мамлекеттик реестрде катталууга тийиш. Бул учурда алган кирешесин көрсөтүп, декларация толтуруу керек, антпесе 25 миң лари айып салынат.
Грузин парламенти бул демилгени кабыл алуу аракетин 2023-жылдын март айында жасаган, бирок кийин массалык нааразылык акцияларынан кийин биринчи окуудан кийин кайра чакыртып алынган. Документтин жаңы редакциясында "чет элдик таасирдин агенти" деген терминдин ордуна "чет элдик мамлекеттин кызыкчылыгын көздөгөн уюм" деген сөз колдонулат. Калган мазмуну ошол эле бойдон калууда.
Мыйзам долбоорунун айланасындагы процесс кайрадан нааразылык акциялары менен коштолду, бул жолу полиция аларды таркатып, активисттерди кармады. Батыш өлкөлөрү тарабынан Тбилисиге коркутуп-үркүтүүлөр болду. ЖМКнын маалыматына караганда, АКШ менен Евробиримдик мыйзамдын үстүндө иштеген саясатчыларга каршы санкцияларды киргизүү мүмкүнчүлүгүн карап жатат жана Еврокомиссия Грузиянын Евробиримдикке мүчөлүккө талапкер статусун ырастабашы мүмкүн.