БИШКЕК, 18-май — Sputnik. Пакистандын премьер-министри Шахбаз Шариф түндө Бишкекте болгон окуя боюнча үн катты. Ал билдирүүсүн социалдык тармактагы баракчасына жазган.
"Бишкектеги пакистандык студенттердин абалына терең тынчсыздануудамын. Пакистандын элчисине бардык зарыл жардамды көрсөтүүнү тапшырдым. Менин кеңсем элчилик менен байланышта болуп, кырдаалга көз салып жатат", — деп жазды Шахбаз Шариф.
Кыргызстандын тышкы иштер министринин орун басары Алмаз Имангазиев Пакистандын өлкөдөгү элчиси Хасан Али Зайгам менен жолугушкан. Имангазиев Зайгамдан пакистандык массалык маалымат каражаттарынын өкүлдөрүнө тастыкталбаган маалыматтарды таратпоону түшүндүрүүнү өтүнүп, кырдаал Кыргызстандын компетенттүү органдарынын көзөмөлүндө экенин билдирген.
Эске салсак, 17-май күнү кечинде Бишкекте чет элдиктер жашаган мейманкананын жанына 200дөй адам топтолгон. 13-майда бул жерде чет элдиктердин катышуусунда мушташ болгондугу маалымдалган. Топтолгон адамдарды милиция кызматкерлери курчап, өзүн агрессивдүү алып жүргөн 50дөй кишини кармап, кийин кайра коё берген. Түн оогондо чогулгандардын саны көбөйүп, миңге чейин жеткени айтылган.
Алар менен Бишкек ШИИББдин жетекчиси сүйлөшүү жүргүзүп, топтолгондор таңга жуук тарашкан.
Бул арада мушташка катышкан делип чет элдик үч жаран кармалып, убактылуу кармоочу жайга киргизилгени белгилүү болгон. Алар кыргыз элинен кечирим сурап, жоопкерчилик тартууга даяр экенин билдиришкен.
Учурда ордо калаада абал туруктуу экенин ИИМ белгилеп, кырдаал толук көзөмөлдө экенин айтууда.
Саламаттык сактоо министрлиги башаламандыктан 29 киши жабыркаганын кабарлады.