БИШКЕК, 17-мар. — Sputnik. Кыргызгидромет агенттиги 23-мартка чейинки аба ырайынын божомолун жарыялады.
Синоптиктердин айтымында, борбор калаа Бишкекте жуманын алгачкы күндөрү күн ачык болот. 20-марттан тарта жума аягына чейин мезгил-мезгили менен жаан жаашы күтүлүүдө. Апта ичи абанын температурасы күндүз 12...19 градуска чейин жылуу болот.
Чүй жана Талас облустары
Өрөөндөрдө 17-18-мартта жаан-чачын күтүлбөйт. 19-мартта тоолуу райондорго кар жаап, андан соң жуманын аягына чейин жаан-чачын болот. Шамалдын ылдамдыгы 21-мартта айрым жерлерде 15-20 метрге чейин жетиши мүмкүн.
Ош, Жалал-Абад жана Баткен облустары
Өлкөнүн түштүгүндө дагы апта башында күн ачык болот. 20, 21 жана 23-мартта көпчүлүк аймактарда жаан, тоолуу райондордо кар жаашы күтүлүүдө. Нооруз күнү айрым жерлерде катуу шамал болушу мүмкүн.
Ысык-Көл жана Нарын облустары
Аймактарда 17-19-март күндөрү жаан-чачын күтүлбөйт. 20-23-мартта көпчүлүк жерлерде жаан, тоолуу райондордо кар жаайт. 21-мартта айрым жерлерде ылдамдыгы секундасына 15-20 метрге жеткен шамал болушу мүмкүн.