БИШКЕК, 23-фев. — Sputnik. Кызыл-Омпол кениндеги жерди азыркы учурда иштете албайбыз, бирок рудаларды алып чыгып кеткенден кийин арпа, буудай, өрүк өстүрсө болот. Бул тууралуу мамлекет башчы Садыр Жапаров "Кабар" агенттигине берген маегинде билдирди.
"Биздеги урандын коркунучу жок. Бул уран — чийки зат. Кандайдыр бир иштерге колдонуу үчүн аны байыткандан кийинки урандан катуу сактаныш керек. Мына ошол уран коркунучтуу болот. Биздеги уранды деле таптакыр коопсуз деп айтуудан алыс болушубуз керек. Өзүнчө бөлүп алгандан кийин аны сактоодо, ары-бери ташып жүрүүдө, албетте, абдан сак болушубуз керек. Адистер тараптан катуу көңүл бурулушу шарт", — деген президент.
Мамлекет башчы кийин ал жерлер дароо рекультивацияланарын кошумчалаган.
"Азыркы убакта ошол жерди иштете албайбыз. Эч нерсе өспөйт. Анткени астында урандын жана башка сейрек кездешүүчү баалуу металдардын элементтери бар. Жер астынан чыккан булактардын суусун да ичкенге болбойт. Себеби суу уранды жана башка металлдарды аралап чыгат. Рудаларды алып чыгып кеткенден кийин артынан жерлер дароо рекультивацияланат. Кажы-Сай, Миң-Куш сыяктуу калдык сактоочу жай да болбойт. Анткени рудалар ал жерде иштетилбейт. Таза жер калат. Кийин бул жерлерди айыл чарба багытындагы иштерге колдонууга болот. Арпа, буудай, өрүк, алма жана башка жер-жемиш өсүмдүктөрүн отургузса болот. Булактан чыккан сууларды да ичсе болот. Себеби уран жана башка элементтердин баары ташылып чыгып кетет да, ал жер тазаланып калат", — деген президент.
Жапаров мамлекет үчүн экономикалык жактан кичине эле пайдасы болсо кандай иштер болбосун аткарып кетүүнү, жок дегенде келе жаткан 10 жылдыкта кошуна өлкөлөргө жетүү керектигин белгилеген.