БИШКЕК, 4-фев. — Sputnik. Түркмөнстан Бишкек ТЭЦиндеги жарылуудан кийин Кыргызстанга 2 тонна суюлтулган газ жөнөттү.
Жардам берүү боюнча атайын документке президент Сердар Бердымухамедов кол койгон.
"Мындай акцияларды жасоо — мамлекеттик саясаттын приоритеттүү багыттарынын бири. Башка кыйынчылык түшүп турганда берген жардам өзгөчө маанилүү, ал эми бир тууган өлкөгө көмөк көрсөтүү гуманизмдин улуу ишинин уланышы", — деп айтылган Түркмөнстан президентинин сайтындагы маалыматта.
Жардам поезд менен жөнөтүлгөн.
Түркмөнстан Бишкек ТЭЦиндеги жарылуудан кийин Кыргызстанга 2 тонна суюлтулган газ жөнөттү.
Мындан мурдараак коңшу Казакстан да Бишкек ТЭЦиндеги жарылуудан улам жардам көрсөтөрү тууралуу маалымдалган. Президент Касым-Жомарт Токаевдин тапшырмасы менен казак тарап Жамбыл ГРЭСинен келген электр кубатынын көлөмүн көбөйтүүнү чечкен.
Кечээ, 3-февралда, Өзбекстан Кыргызстанга суюлтулган газ баллондорун жөнөтүп, ал Жалал-Абадга жеткен.
Коңшу өлкө суюлтулган газ толтурулган 1000 баллонду 9 жүк ташуучу унаа менен жөнөткөн. Ал "Бек-Абад" посту аркылуу өткөрүлгөн.
2024-жылдын 2-февралында болгон Бишкек ТЭЦиндеги жарылуунун кесепетинен калаадагы 60 миңге чукул батир ысык суусуз жана жылуулуксуз калган.
Жекшемби (4-февраль) эртең мененкиге карата 8 буу казан жана 4 турбогенератор иштеп жатканы айтылды. ТЭЦтин жалпы активдүү кубаттуулугу учурда 270 мегаватты түзөт. Ысык суунун температурасы 40тан 61 градуска чейин берилип, авариянын кесепетин жоюу иштери уланууда.