БИШКЕК, 26-дек. — Sputnik. Диетолог Римма Мойсенко Sputnik радиосуна курган маегинде кайсы мөмө-жемишти аарчыбай кабыгы менен колдонсо болорун айтып берди. Адис мындайда жаратылыш өзү да "жол көрсөтүп" турарын билдирген.
Айтымында, жашылча-жемиштин кабыгы калың болсо ал ичиндегисин айлана-чөйрөнүн терс таасиринен сактайт. Демек, кабыгын алып салган туура.
"Манго, авокадо, банандын кабыктары калың, аны сөзсүз аарчып жеш керек. Картошканы да аарчып колдонобуз. Бирок жазында казып алынган жаңы картошканы аарчыбай пайдалануу кеңири жайылган, себеби анын кабыгында калий көп. Жашылча-жемиштин сырты жука болсо аны аарчыбай эле колдонсо болот. Башкысы, жакшылап жууп-тазалоо зарыл. Мөмө-чөмө боюнча айта турган болсок, андагы пайдалуу заттар көп жагын кошо жеген туура. Мисалы, помидордун сыртын тазалоого зарылчылык жок. Алманы дагы кабыгы менен жеш керек, мөмөнүн өзүндө сиңимдүү пектин клетчаткасы бар, кабыгында анча жакшы сиңбей турган клетчатка бар, экөө кошулуп ичеги үчүн сыйкырдуу азык болуп саналат", — деген диетолог.
Ошондой эле ал адам өзүнүн короосунда экологиялык жактан таза өстүргөн жашылчалар болсо топурак астында бышканын деле аарчыбай пайдаланса болорун белгилеген.
"Мисалы, сабиз, кызылча өстүргөн болсоңуз таза жууп эле колдоно берсеңиз болот. Сабиздин жука кабыгында пайдалуу каротиноиддер абдан көп. Бирок кооптуу бактерия, заттарды жок кылып, абдан таза жууш керек. Ал эми аларды базардан сатып алган болсоңуз кабыгын аарчып колдонуу сунушталат", — деди Мойсенко.