БИШКЕК, 3-дек. — Sputnik. Анардын ширеси, липа же ромашкадан демделген, мөмө-чөмө, татымалдар кошулган чай кышкы суукта адамды үшүтпөй, ден соолукка да пайдасын тийгизет. Нутрициолог, фитотерапевт Анжелика Дюваль Sputnik радиосуна курган маегинде суукта иче турган суусундуктар тууралуу айтып берди.
"Анардын ширесине же ромашка, липадан демделген чайларга түрдүү кошулмаларды кошсок болот. Мөмө-жемиштерди, анын ичинен көбүнчө кызыгат, чычырканак, ит мурун, карагат, клюква, алча кошсо жакшы. Мындан тышкары, алма, апельсин, лимон да сунушталат. Татымалдардан гвоздика, корица, кардоман, имбир, мускат жаңгагын колдонуу жакшы натыйжа берет. Бул татымалдарды чайга кошуп ичүү менен бактерияларга каршы да күрөшүүгө болот", – деген Дюваль.
Диетолог мындай суусундуктардын биринин даярдоо ыкмасын да айтып берди.
Эки-үч чоң кашык ит мурунду 80 градус ысык болгон бир литр сууга салабыз. Суу андан ысык болсо пайдалуулугу жоголот, себеби С витамини өтө ысыкты сүйбөйт. Андан кийин 20 мүнөт тыныктырып, ага алма пюресин, имбирди майдалап кошобуз, апельсиндин кабыгын да кошсок болот. Мындан тышкары, кардоман жана суусундукту таттуу кыла турган азык салабыз. Бул суусундук 20 мүнөт тыныгып турушу керек.