БИШКЕК, 20-ноя. — Sputnik. Алдыда турган жумуштарды жасоого болгон каалоонун жоктугу, апатия, энергиянын аздыгы – мындай абалда жашоо образына көңүл буруу кажет. Бул тууралуу эндокринолог, диетолог Екатерина Казачкова Sputnik радиосуна курган маегинде айтып берди.
Адис адегенде уйкунун канып жатканына маани берүү керек экенин билдирген.
"Ушундай абалга кептелген адамга күндүзгү жана түнкү режими нормалдуубу, уйкусун кандырып жатабы деген суроолорду беребиз. Адам түнкүсүн алты-сегиз саат укташы керек. Андан кийин тамактануу режимин сурайбыз. Эгерда ал туура эмес тамактанса, рационунда таттуулар көп болсо, анда анын энергиясы жетишсиз. Мындайда адам жашоодогу зарыл кыймылдар менен өзүн камсыздабайт", – деп түшүндүргөн Екатерина Казачкова.
Айтымында, алсыроо, күчтүн жоктугу кандайдыр бир оорулардан, мисалы, гипотиреоз же аз кандуулуктан кабар бериши мүмкүн.
"Адамда жалкоолук менен байланышкан патологиялык абал болуп жатса, биринчи кезекте калкан безин текшеребиз. Тиреотроптук гормондорго анализ алабыз. Бул – мээден калкан безине барчу көзөмөл гормону. Тиреотроптук гормондордун деңгээлине жараша калкан безинин абалын, гипотиреоздун бар-жогун аныктайбыз. Андан кийин аз кандуулук менен жабыркайбы же жокпу, аны текшеребиз. Эгер анемия болсо, башкача айтканда, гемоглобини төмөн болуп темир жетишпесе, анда адамда жалкоолук пайда болуп, кыймылдагысы келбейт. Жалпылап айтканда, бардык өнөкөт оорулар, өнөкөт вирустук чыңалуулар адамдын күчүн, энергиясын алат", – деген дарыгер.