БИШКЕК, 31-окт. — Sputnik. Россия лидери Владимир Путин палестин-израиль чатагындагы балдардын, медиктердин каза болуп, улгайгандардын азап тартканын көргөндө муштум түйүлүп, бирок эмоцияны эрксизден катып келерин айтты. Бул тууралуу РИА Новости жазды.
"Балдардын канга чыланганын, каза болгонун, картаңдардын, аялдардын азапка түшкөнүн, медиктердин көз жумуп жатканын көргөндө, албетте, көзгө жаш айланып, муштум түйүлөт. Башка эч нерсе дей албайсың. Бирок биз эмоцияга алдырганга укугубуз жок, андайга жол бере албайбыз", — деди Путин.
Бүгүн Россия президенти РФтин күч түзүмдөрүнүн жетекчилери менен кеңешме өткөрүп, Дагестандагы башаламандык менен Жакынкы Чыгыштагы кырдаалды талкуулашкан.
"Жакынкы Чыгыш элинин жана дүйнөнүн башка аймактарынын трагедиясынын артында чындыгында ким турарын, өлүм жыттанган башаламандыкты ким уюштуруп жатканын, ал кимге пайда алып келерин жакшылап түшүнүш керек", — деди Путин.
Газа тилкесинде Израиль тараптын бомбалоосунан каза тапкандар арбыса, алардын 40 пайызга жакыны балдар экени айтылууда. Буга чейин Save the Children уюму акыркы 17 күндө Газа тилкесинде жана 27 күндө Иордандын Батыш жээгинде кеминде эки миңден ашык бала көз жумгандыгын билдирген. Аталган уюмдун директору Жейсон Ли бөбөктөрдүн өмүрүн алып жаткан апаатты токтотууга чакырган.
"Газа тилкесинде акыркы үч аптада каза тапкан кичинекейлердин саны 2019-жылдан тарта 20 мамлекетте болгон бардык куралдуу чатактарда өлтүрүлгөн балдардан ашты", — деп айтышкан уюмдан.
Алар өлтүрүлгөн бөбөктөрдүн мындан да арбышы мүмкүндүгүн, дагы 1000 бала дайынсыз болуп жаткандыгын, кичинекейлердин уранды алдында калышы ыктымалдыгын билдиришкен.
Палестина анклавында кандуу кагылышуудан мертингендердин саны 8000ден ашты, 18 миң жай тургун жаракат алганы айтылууда. Ал эми Израилде 1,4 миңдей киши көз жумду, жаракат алгандар беш миңден ашканы кабарланды.