БИШКЕК, 28-сен. — Sputnik. Башкы прокуратуранын Тергөө башкармалыгынын бөлүм башчысы далил катары алынган 700 миң долларды казинодон уттуруп жиберди деген маалымат чындыкка дал келбейт. Бул тууралуу Sputnik Кыргызстанга аталган ведомстводон билдирди.
Маалыматта дээрлик 1,5 миллиард рублди чыгарып кетүү боюнча кылмыш иши тергелип жатканы айтылат. Ишке банктардын биринин кызматкерлери менен укук коргоо органдарынын кызматкерлери катышкан.
Айыпталуучулар 20 миллион долларды ээсине, тагыраагы, россиялык ишкерлерге кайтарып берген.
Калган 762,5 миң доллар жума күнү кечинде кайтарылган. Бирок банктар бул убакта жабылып калгандыктан, акча андан ары банкка которуу үчүн Р. А. аттуу бөлүм башчынын кызматтык сейфинде убактылуу сактоого коюлган.
“Бирок ал үч күн жумушка чыкпагандыгына байланыштуу, инвентаризация жүргүзүү чечими кабыл алынып, кызматтык сейфинде акчанын жок экендиги аныкталган”, — деп билдирди Башкы прокуратурадан.
Бөлүм башчы акчаны уурдоого шектелип, иш козголгон жана ал камакка алынган. Эртеси эртең менен туугандары 762,5 миң долларды алып келип тергөөгө өткөрүп беришкен.
“Прокуратура кызматкери казиного, кумар оюн жайларына барган деген маалымат чындыкка дал келбейт. Анткени кумар ойноочу жайларга барууга мыйзам тарабынан тыюу салынган. Экинчиден, мындай ири сумманы шектүү казиного уттурса, анда алар жогоруда айтылган сумманы кайтарып бермек эмес. Учурда козголгон кылмыш иштин негизинде тергөө иштери жүргүзүлүүдө. Ал эми Р.А. камакта”, — деп айтылат маалыматта.
Эске салсак, Башкы прокуратуранын Тергөө башкармалыгынын бөлүм башчысы 21-сентябрда кармалган.