БИШКЕК, 21-авг.— Sputnik. Роспотребнадзордун эксперти Екатерина Головкова сапаттуу кара чайды тандоо үчүн эмнелерге көңүл буруу керектигин түшүндүрдү.
Адистин айтымында, адегенде чайдын сырткы көрүнүшүнө көңүл буруу керек. Эгерде сиз тоголоктолбогон кадимки чай сатып алсаңыз, анда жалбырактар дээрлик бирдей көлөмдө, баарынын өңү окшош болушу шарт. Жалбырак канчалык көп буралган болсо ал ферментациядан ошончолук сапаттуу өткөнүн билдирет. Гранул чайында да ар бир тогологу тегиз, көлөмдөрү дээрлик бирдей болгонуна көңүл буруу керек.
"Сапаттуу чайга чаң, кир, жүн дагы башка бир буюмдар аралашпайт. Түсү кара болот, сорттоо учурунда көбүрөөк сүрүлүп калгандар бозомук тартып калат. Мындан тышкары, ар бир чайдын өзүнө тиешелүү жыты бар, бирок эч качан күйүк, темир же көк жыттанбашы керек”, — деген адис.
Ал боёктун бар-жоктугун текшерүү үчүн кургак чайдын үстүнө муздак суу куюп текшерүү керектигине кеңеш берген. Сапаттуу чай канча убакыт өтсө да суу кызарып кетпейт, болгону өңүн билинер-билинбес өзгөртөт.
“Жытын айта турган болсок, айрым чайларга эфир, бергамот майы, кургатылган жемиштер сыяктуу табигый ароматизаторлор кошулат. Эгерде тамак-ашка пайдаланууга уруксат берилген жасалма ароматизаторлор кошулса, анда анын даамы кескин болуп табигый эмес жыт байкалат. Ошондуктан табигый ароматизаторлор менен тандаган оң", – деди Головкова.