БИШКЕК, 7-июн. — Sputnik. Өзгөчө кырдаалдар министрлиги 7-9-июнда республикада күн катуу ысып, бир катар облустарда ысык +40 градуска жетерин маалымдады.
"Сууну көбүрөөк ичип, ысык өткөрүп алуудан сак болуңуз. Кан басымы жогорулар, жүрөгү ооругандар бул күндөрү сыртка жана сапарга чыкпай турганы оң. Өсүмдүктөрдү тез-тез сугарып туруу зарыл", — деп айтылган маалыматта.
Адистердин айтканына таянуу менен ысыктан коргонуу боюнча кеңештерди тизмектедик:
күн нуруна турбаш керек. Колдон келсе көлөкөдө басып, көчөгө көп чыкпаганга аракет кылган оң;
саат 12:00дөн 17:00гө чейин күн ачуу тиет. Бул учурда мүмкүн болушунча салкын жерде жүрүү сунушталат. Бул убакыт аралыгында көчөгө чыга турган болсоңор баш кийим кийип же кол чатыр колдонуу зарыл;
өнөкөт оорусу жоктор суюктукту көбүрөөк ичиши керек. Бирок суу өтө муздак болбошу зарыл. Антпесе тумоолоп калышыңыз ыктымал;
жашылча-жемишти көп жеген оң. Өзгөчө бадыраң, помидор, апельсин, өрүк, алма, дарбыз, коон. Мөмө канчалык ширелүү болсо, ал организмге ошончолук суюктукту керектүү өлчөмдө берет;
кондиционер же вентилятор колдонуңуз. Бирок анын шамалына отурбаш керек, болбосо ооруп каласыз;
ачык түстө, жеңил кийим кийген оң. Эркектер зарыл болбосо галстук тагынбай эле койгону жакшы. Себеби ал кан айланууну начарлатат;
оор иштерди кыскартып, мээге көп күч келтирбеш керек;
чөптө 10-15 мүнөт жылаңайлак басып койсоңуз кан айлануу жакшырып, өзүңүздү жакшы сезип каласыз;
балдарды күнгө көп чыгарбаш керек. Эшикте ойноп жатканда сөзсүз баш кийим кийгизүү зарыл.
Аптаптагы тамактанууга келе турган болсок, россиялык диетолог Мария Аплетаева ысыкта эт азыктарын рациондон алып салган оң экендигин айтат. Анткени алар организмге көптө барып сиңип, ысыкта метаболизм начарлайт. Врач курамында суюктук жана С витамини көп болгондуктан жайкысын жер-жемиш менен көп азыктанып, балык, канаттуу этин жана деңиз азыктарын да четте калтырбоону кеңеш кылат.
Түшкү тамакта жашылчадан жасалган шорпо ичип, окрошка даярдаганда колбасанын ордуна канаттуунун этин пайдалануу сунушталды. Ал эми эртең мененки тамакка жер-жемиш кошулган омлет жасаган оң. Мындан тышкары, ысыкта суусап кан катып калбоо үчүн сууну көп ичүү керек. Ошондой эле ал кара чайдын ордуна көк чай, дары чөп жана жемиштер кошулган чай ичкен жакшы экендигин белгилеген.