БИШКЕК, 25-май — Sputnik. Бүгүн саат 15:00дө Гапар Айтиев атындагы көркөм сүрөт музейинде "Лиля Турусбекова – көрүнүктүү инсан жана режиссёр" аталышындагы сүрөт көргөзмө ачылат. Бул тууралуу Маданият, маалымат, спорт жана жаштар саясаты министрлиги билдирди.
Ага ылайык, сүрөт көргөзмө режиссёр-документалист, Кыргызстандын даректүү тасмаларынын башатында турган Лиля Турусбекованын 90 жылдыгына арналмакчы.
"Документалдык кино тармагында 36 жыл үзгүлтүксүз иштеген эмгек жолунда Лиля Турусбекова өлкөнүн летописин жаратты десек жарашат. Анын фильмографиясында жүзгө жакын тасма бар. Турусбекова өзүнүн кесиптештеринин фильмдеринин редактору, киностудиянын көркөм кеңешинин мүчөсү болгон. Лиля Турусбекованын чыгармачылыгынын өзөгүн жеке адамдын өзү, анын чыгармачылыгы түзгөн. Эмгектери жогорку кесипкөйлүгү менен гана эмес, лирикалуулугу, терең ойлуулугу, тасмалардын жана киноочерктердин каармандарына чын ыкластан кызыгуусу менен да айырмаланып турат. Ал тарткан тасмалар биздин замандаштар үчүн бүтүндөй бир доордун жана өлкөбүздүн документалдык тарыхынын айрып алгыс бир бөлүгүн өзүнө камтыган баалуу таберик болуп калды", — деп айтылат министрликтин билдирүүсүндө.
Лиля Турусбекова 1933-жылдын 8-майында Фрунзе шаарында, Улуу Ата Мекендик согушка кетип кан майдандан кайтпай калган белгилүү советтик акын жана драматург Жусуп Турусбековдун үй-бүлөсүндө туулган.
1951-жылы Фрунзе шаарындагы №28 мектепти аяктаган соң Москва шаарындагы Бүткүл союздук мамлекеттик кинематография институтунун режиссёрлук факультетине тапшырып, 1956-жылы аяктаган.
Турусбекованын эмгектери бааланып, Кыргыз Республикасынын искусствосуна эмгек сиңирген ишмер ардактуу наамы, Ардак белгиси ордени, Эмгектин ветераны медалы, Кыргыз ССРинин Жогорку Кеңешинин Ардак грамотасы, СССР кинематографиясынын мыктысы төш белгиси менен сыйланган.
Лиля Турусбекованын көрөрмандар жогору баалаган документалдык фильмдеринин катарына: "Алар Тянь-Шанда төрөлгөн", "Кыргыз искусствосунун майрамы", "Сенин курбуларың", "Улуу эпос", "Кыргыз искусствосунун чеберлери", "Кыргызстандагы советтик кино жумалыгы", "Жаз соңунда", "Кошой-Таш", "Жаңырган жерде" жана башкалар кирет.