БИШКЕК, 25-май — Sputnik. Казинолордон өкмөт убадалаган каражат бюджетке түшпөсө Жогорку Кеңеш мыйзам кабыл алып, кайрадан жабыш керек. Бул тууралуу депутат Балбак Түлөбаев парламентте билдирди.
Эл өкүлү министрлер кабинети кумар оюндарына уруксат берүү мыйзамын алып келгенде жылына бюджетке 2 миллиард сомдон ашык түшөрүн айтканын эске салды.
"Эгер жыл соңуна чейин аталган сумма чогулбаса казино мыйзамын жокко чыгарып туруп айдап жибериш керек. Экс-губернатор, экс-депутат лицензия алыптыр деп чыгып жатат. Биз алар байысын деп казино мыйзамын кабыл алган жокпуз. Жылдын аягында канча салык түшкөнүн көрөбүз. Бюджетке 2 миллиард сом түшөт дегени үчүн бүткүл абийир, намысыбызды коюп өкмөттү колдоп бергенбиз. Элге жаман көрүнүп, каргыш, тил укканбыз. Биздин мыйзам менен бир чиновниктин байышына макул эмесмин", — деди Түлөбаев.
Ал экс-чиновник Жогорку Кеңешти жаманатты кылып, өзү жыргап казино ачып мамлекетке акча төкпөсө мыйзамдын кереги жок деп эсептейт.
Өз кезегинде Финансы рыногун көзөмөлдөө кызматынын жетекчиси Марат Пирназаров төрт букмекердик конторага (42 миллион сом), бир казиного (84 миллион сом) лицензия берилгенин билдирди. Андан жалпы 126 миллион сом түшкөн.
Казино иштетүүгө уруксат берген мыйзам былтыр көптөгөн талаш-тартыш менен өткөн болчу. Бийлик кумар оюндарына Кыргызстандын жарандары кирбей турганын айтып, негизги максат бюджетти толтуруу экенин белгилеген. Өз кезегинде президент Садыр Жапаров казинолор ачылса казынага миллиарддаган сомдук салык түшөрүн билдирген.