БИШКЕК, 22-май — Sputnik. Анык эмес маалымат чыгарган деген доомат менен сайттардын үстүнөн 22 арыз түштү. Бул тууралуу маданият, маалымат, спорт жана жаштар саясаты министринин орун басары Чыңгыз Эсенгул уулу ЖКнын Социалдык саясат комитетинде билдирди.
Анын айтымында, министрлик былтыртан бери 22 арызды карап чыккан. Анын ичинен үч интернет-сайт эки айга жабылган, бирөө арыз ээси тарабынан кайтарып алынган. Жетөө кароосуз калтырылды, анткени даттануусу социалдык тармактарга багытталган. Дагы жети кайрылуу келтирген жүйөөсү толук эместигине байланыштуу каралган эмес. Маалыматтык сегиз сайт өздөрү кемчилигин мойнуна алып ыктыярдуу түрдө өчүргөн. Ал эми ЖМКнын чыгарган материалы туура болуп, даттануу негизсиз деп табылган бир учур катталган. Бир эле адам эки-үч макала боюнча арыз жазган учурлар да бар.
Ал эми депутат Чыңгыз Айдарбеков "саясатчылар ЖМКлардын үстүнөн көп арызданабы?" деп сурады.
"Арыздар көбүнчө ишкерлерден түшөт. Буга чейин депутат Эрулан Көкүловдон дагы арыз келген, бирок аны артка кайтарганбыз. "Республика" сайтын соттун чечиминин негизинде жаптык, 24.kg агенттиги боюнча өлкө аймагында иштеген ишкер кайрылган, ошонун алкагында чара көрүлгөн. Ал эми "Азаттыкка" мамлекеттин кызыкчылыгы үчүн министрлик өзүбүз арыз бергенбиз. Бизде эч кандай тандоо, кайсы бир ЖМКга жан тартуу же жаман көрүү деген жок. Мыйзамдар менен жашайбыз, кайрылууларды Башкы прокуратура текшерип турат", — деди Эсенгул уулу.