БИШКЕК, 6-май – Sputnik. Быйыл Ысык-Көлдөгү Кызыл-Кыя ашуусунун жолу оңдолот. Бул тууралуу Транспорт жана коммуникациялар министрлиги билдирди.
Маалыматка караганда, мындай тапшырманы министр Тилек Текебаев Ысык-Көлгө болгон иш сапарынын алкагында берген.
"Азыркы тапта ашууда кар жатат. Күн жылып, кар кетери менен жолду оңдоп-түзөө иштери башталат. Кызыл-Кыя ашуусунун жолу – 15 чакырымды түзгөн шагыл жол. Дээрлик 20 жылдан бери карала элек бул тилке быйыл министрдин тапшырмасынын негизинде оңдоп-түзөлөт", - деп айтылат маалыматта.
Быйыл планга кирген жолдордун өз убагында бүткөрүлүшү министрдин жеке көзөмөлүндө болору белгиленди.