БИШКЕК, 5-май — Sputnik. Венгрия-кыргыз өнүктүрүү фондунун жетекчиси Темирбек Эркинов УКМКнын тергөө абагына 3-июлга чейин камакка алынды. Бул тууралуу Биринчи май райондук соту кабарлады.
Эркинов коррупцияга айыпталып жатат. Кененирээк маалымат бериле элек. Анын кармалганы кечээ айтылган.
Аталган фонд 2021-жылы түзүлүп, Эркинов ошондон бери иштеп келген. Фонд Кыргызстанда өзүн-өзү актаган долбоорлорго займ берүү, капиталына катышуу жана өлкө аймагында катталып, өз ишмердүүлүгүн жүргүзгөн чарба субъектилерин каржылоо максатында ачылган.
Эркинов эмгек жолун парламенттен катардагы кызматкер болуп баштаган, андан кийин Соода-өнөр жай палатасында иштеп, бизнес жана коомдук иштер менен алектенген. 2014-жылы Бангладештин Кыргызстандагы ардактуу консулу болгон.