БИШКЕК, 4-май — Sputnik. Кыргызстан калкынын 76,2 пайызы аз кыймылдайт. Бул тууралуу Саламаттык сактоо министрлигинин алдындагы Ден соолукту чыңдоо борбору маалымдап, көп кыймылдоонун адамдын саламаттыгына тийгизген таасирин тизмектеди.
Борбордун маалыматына ылайык, көп кыймылдоо:
кан басымды нормада кармайт;
семирип кетүүдөн сактайт;
жүрөк-кан тамыр системасын күчтөндүрөт;
кандагы холестерин менен канттын деңгээлинин нормада турушуна жардам берет.
Ден соолукту чыңдоо борбору кыймылды деңгээлине жараша экиге бөлгөн.
Кыймылдын орточо деңгээлине: велосипедде жай же орточо ылдамдыкта жүрүү, тез басуу, тепкич менен чыгып-түшүү, бакта, огороддо иштөө, бийлөө, көп кыймылдай турган оюндарды ойноо, балдар менен биргеликте дене тарбиялык көнүгүүлөрдү жасоо кирет. Мындан тышкары, үй жумуштары жана чарба жумуштарын жасоо, үйдүн дубалын актоо, үйдүн чатырын жабуу, бөлмө ичиндеги буюмдарды жылдыруу, жайгаштыруу (салмагы 20 килограммдан аз болушу керек) да кыймылдын орточо деңгээли болот.
Интенсивдүү кыймылга чуркоо, өтө тез басуу, велосипед менен жогорку ылдамдыкта жүрүү, отун жаруу, жер казуу өңдүү короодогу оор жумуштар, сууда сүзүү, аэробика, тоого чыгуу, спорттук мелдештер, оюндар жана башкалар кирет.
"Бир жаштан 17 жашка чейинки балдар күнүнө жалпысынан бир сааттан кем эмес орто жана интенсивдүү кыймылда болушу керек. Ал эми 18 жаштан 64 жашка чейинкилер аптасына аз дегенде 2,5 саат орто кыймылда жана 1 саат 15 мүнөт интенсивдүү кыймылдашы керек. Мында ар бир кыймылдын түрү 10 мүнөттөн кем болбогону туура (мисалы, чуркасаңыз бир учурда он мүнөттөн кем эмес). 65 жаштан өткөндөр саламаттыгынын мүмкүнчүлүгүнө жараша кыймылдап турушу кажет", — деп жазылат маалыматта.