БИШКЕК, 27-апр. — Sputnik. Россияда иштеп жүргөн кыргызстандык таксист Жеңишбек Кабылов шылуундардын тобун алдап, пенсионер аялга 500 миң рублин кайтарып берди. Мекендеш башынан кечирген окуясын айтып берип, "Рен ТВ" телеканалына маек курган.
Курьер кырдаал кандай нукта өнүгүп баратканын гана боолголоп тим болбой, өз кызматы үчүн акы да алып, аялдын акчасын да сактап калган схеманы иштеп чыккан. Натыйжада кыргызстандык жөнөкөй жигит шылуундардын өзүн алдап кеткен.
Окуянын чоо-жайы
Бул кадимки эле буйрутма болгон, таксист пенсионер аялдын сумкасын алып айтылган дарекке жеткирип бермек.
"Мен буйрутма алгандан кийин тигилер мага дагы бир жолу чалып, шашып жаткандыктарын, андыктан менин да тезирээк келишимди өтүнүштү", — деп айтып берген Кабылов.
Айдоочу пенсионер аялдан да шектене баштаган. Посылканы берип жатып ою бир жерде болбой тынчсызданып жатканы байкалган. Курьердин "бул акчабы?" деген суроосуна "жок" деп жооп берген. Жолдо баратып Жеңишбек баштыкты ачып көрүүнү чечет. Бет аарчы, печенье, көйнөктөрдүн алдында жарым миллион рубль акча бар экени белгилүү болгон. Кырдаалды, буйрутма берген адамдын абалын анализдеп, айдоочу ишенчээк аялдын акчасын шыпырып алууну көздөгөн шылуунчулук схеманын бир бөлүгү болуп калганын түшүнгөн.
Жеңишбек сумкадан акчаны алып чыгат. Буйрутмадан баш тартууну ойлонуп, кайра ал оюнан кайтат.
"Кетирген убактым үчүн акча алышым керек да. Айткан жерине келдим, акчасын алып, бош баштыкты карматтым", — деди таксист.
Заказы үчүн 2000ден ашуун рубль төлөгөн буюртмачы сумканы алган боюнча үйгө кирип кетет. Кайра жолго чыккан Жеңишбекке бир нече мүнөттөн кийин телефон чалышат.
"Мага чалып коркута башташты. "Баштыкты эмне аңтардың, акчаны кайтар, баары бир таап алабыз" дешти", — деп айтып берген мекендеш.
Таксист полицияга кайрылып, андан ары пенсионер аялдын үйүн көздөй жол алган. Бекер шектенбептир, аял чындап эле шылуундардын кайырмагына илинип калган экен. Телефонуна чалган "тергөөчүлөр" аварияга кабылган сиңдисин сактап калабыз деп акча талап кылышкан.
"Сотко бербеш үчүн акча керек экенин айтышты. Үч миллион сомдой дешти. Мен андай акчам жок экенин айттым", — дейт жабырлануучу Светлана Малютина.
84 жаштагы аялды ай-буйга келтиришкен эмес, эки жакка чалууга тыюу салып, психологиялык кысым көрсөтүшкөн. Пенсионер болгон акчасын жыйнап, курьерден берип жиберген. Айтканын айткандай жасаган кемпир полиция кызматкери менен кайра келген таксистти көрүп аябай таң калган.
"Окуянын чоо-жайы дайын болгондон кийин полиция аялга таксист аны шылуундардан сактап калганын айтып берген. Акчасы кайтарылган кемпир таксистке алкышын айтты", — деди Россия ИИМинин Москва боюнча ББдин маалымат жана коомчулук менен байланышуу башкармалыгынын башчысы Владимир Васин.
Жеңишбек өзү кандайдыр бир эрдик жасадым деп эсептебейт. Анын ордунда ким да болсо ушундай кылмак деген пикирде. Достору Жеңишбек абдан боорукер, жардамга дайым кол суна билген адам экенин айтышкан.
Кыргызстандык таксисттин окуясынан кийин тартип сакчылары кезектеги телефон шылуундарынын изине түшүп, учурда кылмыш иши козголду. Жеңишбектин берген маалыматы алдамчыларды тезирээк аныктоого шарт түзөт.
Учурда мекендешибиз кадимкидей эле иштеп жүрөт. Ыраазычылык иретинде агрегатор ага бонустарды ыйгарган.