БИШКЕК, 5-апр. — Sputnik. Украина президенти Россия менен сүйлөшүүлөргө даярданыш үчүн Варшавага келет. Бул тууралуу Польшанын кургактагы аскерлеринин мурдагы жетекчиси генерал Вальдемар Скшипчактын Rzecz pospolita басылмасына берген маегине таянып РИА Новости жазды.
Анын пикиринде, украин кризисинде "стратегиялык туюктук" калыптанды жана бардык нерселер, багыттар чыр-чатакты токтотууга туура келе турган учурдун "саясий жол" менен аякташына жакындап калганын көрсөтүп турат.
Скшипчак жакынкы аралыкта Москва менен Киевдин мунасага келишине жасалган аракетти күтүүгө болорун айткан.
"Зеленскийдин пикиринде, Варшавага поезд менен түндө баруу жашыруун кылынган иш эмес, ал Украина президентинин Польшанын лидерине жасалган расмий сапары экени маанилүү. Бул — мындай маанайда жасала турган кадамдардын алгачкысы. Зеленскийге айланасына саясий колдоо көрсөтө турган атмосфераны түзүшү керек болуп турат. Ага аскердик жардам берилүүдө, бирок чатактын аягы көрүнүп калган учурда, менимче, эми ага саясий колдоо зарыл", — деген польшалык генерал.
Скшипчак муну менен катар эле Батыштын Украинадагы чатактан чарчап бүткөнү абалды жөндөөгө көмөкчү болорун белгилеген. Мурдараак Зеленскийдин 5-апрелде Варшавага барары кабарланган эле.
Москва сүйлөшүүлөргө даяр экендигин бир нече ирет билдирген, бирок Киев мыйзам менен ага тыюу салган. Батыш өлкөлөрү Украина согуш талаасында Россияны жеңиш керек деп айтып келет жана Киев бийлигине курал-жарак, ок-дары берүүнү токтоткон жок. Кремль аскердик жардам эч нерсени чечпей тургандыгын эскертип, болгону украин элинин азабы арта берерин белгилеген.