БИШКЕК, 29-мар. — Sputnik. Түнкүсүн жакшы эс алам дегендер уктоочу бөлмөгө айрым буюмдарды жолотпой эле коюшу керек. Бул тууралуу психолог Анастасия Корнеева "Доктор Питер" басылмасындагы маегинде айтты.
Тынч уйкуга тоскоол болчу нерселер
Электрондук буюм-тайымдар:
Уктоочу бөлмөдө сыналгы, компьютер, смартфон сыяктуулардын болбой эле койгону жакшы. Эгер алардан арылууга мүмкүнчүлүк жок болсо, жок дегенде жарымын башка бөлмөгө чыгарыңыз.
Индикаторлор:
Дээрлик бардык техникада өчүп турганда да тынымсыз күйүп турган "лампалар" бар. Мисалы, телевизордун кызыл жарыгы, компьютердин клавиатурасынын арткы жарыгы дегендей. Алар билинбегени менен уйкуну бир топ бузат.
"Ызы-чуулуу" нерселер:
Жел болгондо шыртылдаган жалюзи, дубалга илген сааттын чыкылдагы сыяктуу нерселер байкалбаганы менен акырындан мээни "жеп коёт".
Жибек же синтетика шейшеп:
Жибек шейшептер сүрөттө же видеодо сонун көрүнгөнү менен күнүмдүк турмушта анча ыңгайсыз. Жайы ысытып, кышында үшүтөт.
Жука парда:
Сыртка кылайган жарык түшсө дагы бөлмөнүн ичине жетип, уйкуну бузат.
Портреттер:
Көпчүлүк адамдарга башка адамдардын жүзү, көз карашы тартылган сүрөттөр терс таасир этет. Өзгөчө көзү өтүп кеткен тууган-уруктун сүрөттөрү түн ичинде жагымсыз сезимдерге бөлөйт.
Тар жана ыңгайсыз кийим:
Уктоо учурунда кийген кийим эң биринчиден ыңгайлуу болушу керек. Кооз, бирок денеге жагымсыз ич кийимдерден оолак болуңуз.
