БИШКЕК, 25-фев. — Sputnik. Министрлер кабинетинин төрагасы Акылбек Жапаров саясатчыларды жалган сүйлөбөөгө чакырды. Анын "Кабар" улуттук агенттигине берген маеги жарыяланды.
Ал "Кыргызстандан 19 тонна алтын уурдалыптыр" деген сөздү депутат Адахан Мадумаров айтып чыкканын белгиледи. Ошол замат эле президент депутаттык комиссия түзүп, башына Мадумаровдун өзүн коюп, текшерип келип жыйынтыгын элге жарыялоону сунуштаганын билдирди.
"Депутаттык комиссия түзүлгөн. Бирок Мадумаров жетектөөдөн баш тарткан. Андан кийин Исхак Масалиевди коюшкан. Кийинчерээк ал дагы баш тартты. Андан кийин Арсланбек Малиевди коюшту. Ошондон кийин барып текшерип көрүшүп, бир грамм алтын уурдалбасына көздөрү жетти", — деди өкмөт башчы.
Андан соң журналист Мадумаров менен Масалиевдин эмнеге комиссиянын башына тургандан качканын сураган.
"Жоопкерчиликти сезбеген саясатчылар ушундай болот. Элге жакшы көрүнүш үчүн балп этип, жалганды айтып кое беришет. Жоопкерчиликти унутуп коюшат. Сотко берсең жоопко тартылат. Анан "саясий куугунтук болуп жатат" деп кыйкырып чыгышат. Бизде, тилекке каршы, ушундай көрүнүш калыптанып калган. Ошол үчүн саясатчылар жалган айтканды токтотсо жакшы болмок", — деди Жапаров.
Белгилей кетсек, Кумтөрдөн казылган 19,2 тонна алтындын аты аталбаган өлкөлөргө сатылышы боюнча чуу чыккан. Андан тышкары, "Кумтөр голд компани" ишканасынын директору Теңиз Бөлтүрүк кызматтан четтетилген. Башкы прокуратура компанияда коррупциялык схема түзүлүп, мамлекетке 1 миллиард сомго жакын зыян келтирилгенин билдирген. Мындан улам өткөн жылдын 28-сентябрында алтындын кайда кеткенин иликтөө үчүн депутаттык комиссия түзүлгөн.