БИШКЕК, 22-фев. — Sputnik. Мамлекеттик тышкы карыздан кутулуу үчүн ачылган депозиттик эсепке 31 миллион сом топтолду. Бул тууралуу Кыргызстандын Финансы министрлиги билдирди.
Маалыматта белгиленгендей, № 44010011030000253 депозиттик эсеп министрликтин системасында ачылган.
"Бул эсепке жеке жана юридикалык жактардан каражат түшүп жатат. 2023-жылдын 20-февралына карата маалымат боюнча эсепке 31 миллион 532,87 сом түштү", — деп айтылат маалыматта.
Эсеп качан ачылганы такталган жок. Маалыматта эсеп өкмөттүн 2021-жылдын 4-мартындагы токтомуна ылайык ачылганы айтылган.
Анткен менен ага чейин, 2020-жылдын ноябрь айында Садыр Жапаровдун тапшырмасы менен депозиттик эсеп ачылган.
Соңку маалыматтар боюнча (өткөн жылдын ноябрь айына карата), өлкөнүн тышкы карызы 4,3 миллиард долларды түзөт.