БИШКЕК, 18-фев. — Sputnik. Түндө Бишкек — Ош унаа жолунун Чычкан капчыгайына кар көчкү түштү. Бул тууралуу транспорт жана коммуникациялар министри Тилек Текебаев социалдык баракчасына жазды.
Ал эми ӨКМдин алдын ала маалыматы боюнча, бүгүн саат 09:30 чамасында унаа жолдун 223-чакырымында (Чычкан капчыгайынын Шаркыратма тилкеси) көчкү түшкөн. Учурда анын көлөмү такталууда.
Жерине Жол тейлөө ишканасынан эки жүктөгүч тартылган. Алар 231-чакырымга түшкөн кар көчкүнү дагы тазалап, андан соң 223-чакырымга барышары айтылды.
Токтогул районунун “Арал” жана Жайыл районунун "Сосновка" постторунда унаалардын бардык түрүнө чектөө киргизилген.