БИШКЕК, 5-фев. — Sputnik. Кыргызстандык Айпери Медет кызы эркин күрөш боюнча Zagreb Open турниринде күмүш медаль тагынды. Бул тууралуу Бириккен күрөш дүйнөсү билдирди.
Турнир 1-февралда башталып, бүгүн, 5-февралда, Загреб шаарында (Хорватия) жыйынтыкталат. Бул 2023-жылдагы биринчи рейтингдик мелдеш. Ага 600гө жакын спортчу катышууда.
76 килограммга чейинки салмак ченинде күч сынашкан Медет кызы Индия менен Канададан келген атаандаштарын (экөө тең 5:0 эсебинде), андан кийин кытайлык кызды (6:1) жеңип, финалга чыккан эле. Бирок чечүүчү беттеште америкалык Елена Макойедге 2:4 эсебинде жеңилип калды.