БИШКЕК, 19-янв. — Sputnik. Милиция Кыргызстанда уюшкан кылмыштуу топтун 2000 мүчөсү бар экенин айтууда, анын ичинен канчасы спортчу? Мындай суроону Жогорку Кеңештин депутаты Эмил Жамгырчиев берди.
"Спортчулар уюшкан кылмыштуу топторго ооп кетип жатат деген сөздөр айтылууда. Чыныгы спортчулардын аброюна шек келтирбеш үчүн канчоо кылмыштуу топторго кирип кеткенин айтып коюңузчу", — деп кайрылды депутат.
Ички иштер министринин орун басары Нурбек Абдиев өлкөдөгү бүт спорт клубдардын ээлери жана спортчулары менен иш алып жүрүп жатканын, Ош, Жалал-Абадда эле 151 спорт клуб иштей турганын айтты.
"Жаш жигиттер эрежесиз мушташ, бокс сыяктуу спорттун түрлөрү менен машыгат экен. Кээ бири ден соолугун чыңдоо үчүн барат, өкүнүчтүүсү — айрымдары кылмышка даярдануу максатын көздөйт. Мен чыныгы спортчуларга шек келтиргим келбейт. Бирок машыктыруучулардан суранып кетет элем, балдардын жүрүм-турумун карап, акыл-насаат айтып, күчүн өлкөнүн туусун көтөрүү үчүн гана жумшап, кылмыштуу иштерге колдонууга болбойт деген таалим-тарбия берсе бизге чоң жардам болот эле. Азыр биз акырындык менен кылмыштуу чөйрөгө аралашкан спортчуларды каттоого алып жатабыз", — деди Абдиев.
Ошондой эле ал милиция спорт залдарга барып ээлери менен сүйлөшүп, кылмыштан оолак болушун айтып-деп жатканын кошумчалады.
Белгилей кетсек, Оштогу кылмыштуу топтордун жаңжалына аралашкандардын бири эрежесиз мушташ боюнча Азия чемпиону экени белгилүү болгон.