БИШКЕК, 1-янв. — Sputnik. Эмне үчүн айрым адамдар спирттик ичимдик ичкендин эртеси кадимкидей эле жүрө берет, ал эми кээ бирлери баш жазууну каалашат? РИА Новости бул боюнча окумуштуулардын изилдөөсүн жазды.
Анда айтылгандай, алкоголдук ичимдик ичкендердин беш пайызы гана ага туруштук берет. Калгандарыныкы генинен, ден соолугунан жана психологиялык абалынан көз каранды.
"Ичкендин эртеси адамдын кыйналганы организмде суунун жетишсиздиги менен байланыштуу. Ичимдик ичкен учурда организмден суюктук көп чыгарын байкайбыз. Мындан тышкары, ацетальдегид — этанолду бузган уулуу зат топтолуп калат. Ошол эле учурда алкоголь нерв клеткаларынан өткөн импульстардын балансын убактылуу бузат", — деген медицина илимдеринин доктору Наталья Шиндряева.
Спирт ичимдиги негизинен боор аркылуу иштетилет, аны сиңирүү үчүн организмден ферменттер бөлүнүп чыгат. Алкогольдегидрогеназдын (ADH) жардамы менен этил спирти ацетальдегиддин деңгээлинде кычкылданып, уксус кычкылынын деңгээлине жетип, организмден бөлүнүп чыгат. Окумуштуулар алкогольдегидрогеназ (ADH) жай иштеген адамдардын ичкендин эртеси баш жазгысы келерин айтышкан.
Спирттик ичимдикти ичкен соң адам бат эле кайра калыбына келип калуусу ферменттерден тышкары анын ичеги-карындагы микрофлораларына да байланыштуу. Эгерде алкоголду бул органдары сиңирип, бөлүп чыгарып сала алса ал эртеси баш жазууну ойлонбойт.