БИШКЕК, 28-дек. — Sputnik. Жогорку Кеңештин депутаты Өмүрбек Бакировдун мыйзамдагы ууру Камчы Көлбаев менен жолукканы аныкталды. Бул тууралуу УКМКнын маалымат кызматы билдирди.
Атайын кызмат кылмышкерлер менен мындай байланыштар өлкөнүн жогорку жетекчилигинин экономиканы өнүктүрүүгө жана мамлекеттүүлүктү чыңдоого багытталган аракеттерин жокко чыгаруу болуп саналарын белгиледи.
"Криминалдык авторитет Камчы Асанбек (Көлбаев) менен депутат Өмүрбек Бакировдун ортосундагы байланыш өзгөчө көңүл бурууга татыктуу. Себеби, быйыл 25-декабрда Бакиров атайын Чолпон-Ата шаарына уюшкан кылмыштуу топтун лидери менен "Барс" спорттук-эс алуу комплексине жашыруун жолугушуу үчүн келгендиги аныкталды. Бул боюнча далилдүү фактылар бар", — деп жазылат маалыматта.
Ушуга байланыштуу УКМК мамлекеттик кызматкерлерге, анын ичинде депутаттарга кылмыштуу элементтерге аралашууга жол берилбестигин эскертти. Бул алардын кылмыштуу аракеттерине шериктештик катары бааланары кошумчаланды.
Эскерте кетсек, Өмүрбек Бакиров парламенттин 17-ноябрдагы жыйынында УКМК төрагасы Камчыбек Ташиев менен кайым айтышкан болчу. Анын эртеси депутат кабинетинен чыгып калган.
Андан кийин ал шайлоо учурунда добуш сатып алууга айыпталып, мурда соттон жабылган иш кайра жанданган. Бул депутатты мандатынан ажыратууга алып келет.