БИШКЕК, 1-дек. — Sputnik. Дача СУ айылындагы авиакырсыкты иликтеген комиссия кимге канча компенсация берилгенин жарыялады.
Комиссиянын төрагасы Алмамбет Шыкмаматовдун айтымында, кыргыз өкмөтү учак ээси аталган түркиялык AСT Airlines авиакомпаниясынан 4,5 миллион доллар (306 миллион сом) кенемте өндүргөн.
"Жабырлануучуларга 150-200 миң доллар, үйлөрү талкалангандарга 30-40 миң доллардан берилген. Компенсация албай калгандар болгон жок", — деди Шыкмаматов.
Корутундуга ылайык, Өзгөчө кырдаалдар министрлигинин атайын эсебине элден 102, 15 миллион сом чогулган.
Ал төмөнкүдөй бөлүнгөн:
каза болгондордун жакындарына — 70,5 миллион сом;
толугу менен бузулган үйлөрдүн ээлерине — 12,72 миллион сом;
жарым-жартылай же толук бузулган пайдубалдардын ээлерине — 240 миң сом;
жаракат алган жабырлануучуларга — 1,8 миллион сом;
жетим балдарга – 7 миллион сом;
психологиялык стресске кабылган үй-бүлөлөргө — 2,77 миллион сом;
үй-бүлөлөргө моралдык жана материалдык жардам — 4,93 миллион сом;
Дача СУ айылынын инфраструктурасын өнүктүрүүгө жана жакшыртууга — 2,19 миллион сом.
AСT Airlines авиакомпаниясынан 4,5 миллион доллар төмөнкү категориялар боюнча берилген:
Өкмөт зыян тарткан жана орду толтурулууга тийиш болгон чыгашалар — 600 миң доллар:
Болжолдуу мүлктүк зыян — 1 миллион 482,5 миң доллар;
Курман болгон 35 маркумга компенсация — 2,1 миллион доллар;
Окуянын кесепетинен жабыркаган/жараат алган адамдарга компенсация — 317,5 миң сом.
Эскерте кетсек, Дача СУ каргашасы 2017-жылы 16-январда эртең менен болгон. Жүгү бар Boeing учуп-конуу тилкесинен чыгып кетип, аэропорттун жанындагы Дача СУ айылына кулаган. Анын кесепетинен айылдын 35 тургуну менен экипаждын төрт мүчөсү тең каза тапкан.