БИШКЕК, 28-ноя. — Sputnik. УКМКнын маалымат кызматы Жогорку Кеңештин депутаты Чыңгыз Айдарбековдун кармалышы боюнча билдирүүнү төгүндөдү.
Мекеме депутатты кайсы бир иш боюнча суракка алды деген кепти дагы четке какты. УКМКнын маалыматына ылайык, Айдарбеков чек арадан Казакстанга өтүп кеткен.
Белгилей кетсек, 26-ноябрда "Альянс" фракциясынын депутаттары Чыңгыз Айдарбеков менен Эмил Жамгырчиев коңшу өлкөгө тажияга бараткан. "Ак-Жол" чек ара бекетинен Жамгырчиевди өткөрбөй, ага мамлекеттен чыгууга тыюу салынганын айтышкан. Андан соң УКМК кызматкерлери аны алып кетип, бир нече убактан кийин бошоткон.
Эртеси депутат Эльвира Сурабалдиева Айдарбековдун дайыны чыкпай жатканын билдирген.
Буга чейин Айдарбеков Жогорку Кеңештин эл аралык иштер, коргоо жана коопсуздук боюнча комитетинин төрагалыгынан алынган. Ага ишеним көрсөтпөө чечимин үч фракция жана депутаттык топ колдогон.
Буга Айдарбековдун комитет жыйынында кабыл алынган кыргыз-өзбек чек арасынын айрым тилкелерин делимитациялоо боюнча макулдашуу долбоорун колдоо чечимине кол койбогону себеп болгон. Ал өз позициясын депутаттарга документтердин толук пакети көрсөтүлбөгөнү менен түшүндүргөн.
Андан соң ал Кыргызстандын атайын жана ыйгарым укуктуу элчиси дипломатиялык рангынан ажыратылган.