БИШКЕК, 12-ноя. — Sputnik. Мамлекет башчы Садыр Жапаров өлкөдө айдоочулук күбөлүктү берүү тыкыр көзөмөлгө алынарын айтып, "Унаа" мамлекеттик ишканасынын иштөө ыкмасы оңолуп, жөнгө салынганча жеке көзөмөлүндө болорун социалдык тармактагы баракчасы аркылуу эскертти.
"Айрым чиновниктердин, айрыкча күч түзүмдөрүндө иштеген аткаминерлердин айдоочулук күбөлүктү тууган-туушкан, жек-жаатына белек катары берип келгени эч кимге жашыруун эмес. Мындан тышкары, ар кыл коррупциялык схемаларды түзүп, мамлекеттик кызматты өз кызыкчылыгына пайдаланып, киреше табуунун булагы катары көргөндөр да бар. Аларга аёо болбойт", — деп жазган президент.
Президент айдоочулук күбөлүктү алуу үчүн компьютердик экзамендер киргизилгенин эске салып, бир тууганынын кызы айдоочулук күбөлүк алуу үчүн сынакка сегизинчи ирет кирүүгө даярдык көрүп жатканын айткан.
"Бул эң туура жана кубаттоого арзый турган чечим деп эсептейм. Сиздерди дагы бул тармактагы чирип бараткан системаны жоюуга салым кошууга чакырып кетер элем. Экзаменди айланып өтүү амалдарын көргөндөр болууда. Төмөндөгү сүрөттөр менен тасмада "Унаа" ишканасынын Жалал-Абаддагы филиалында айдоочулук күбөлүктү мыйзамсыз берүүнүн айла-амалы кылып дүрбүгө чейин колдонулганын көрүүгө болот. Алар терезеден шыкаалап, сынактагы жоопторду тууралап турушкан. Эми мунун кесепети айтпаса да түшүнүктүү. Бул өлкө боюнча катталган жол кырсыктарына, бейкүнөө өлүмдөргө себеп болуп келет. Канча деген жарандарыбыз кан жолдо набыт болууда. Ошондуктан эми мурдагыдай тааныш-билиш же акчанын күчүнө салып айдоочулук күбөлүк алууга жол берилбейт. Андайга баруу аракеттерине мыйзам чегиндеги кескин жана катаал чаралар колдонулат", — деген мамлекет башчы.
Садыр Жапаров ар кимге "крыша" болом дегендерге эскертүү берген.
"Кайсы кызматкер прокуратуранын кайсы кызматкерине чалганы, ким-кимге "крыша" болуп берем деп ишендиргенинен бери менде толук маалымат бар. Мыйзамсыз иш-аракеттерге барууңарды токтоткула, акыркы жолу эскертем! Эртең туугандарыңар дагы "элдин баласы болчу" деп ыйламсырап чыкпасын! Автоунааны жол кыймылынын эрежелерин мыкты билген айдоочу отурганда гана жол кырсыктарынын, өлүмдүн саны азаят", — деп жазган Жапаров.