БИШКЕК, 22-окт. — Sputnik. Чагымчылдар Кемпир-Абад боюнча маселени түшүнүп турса дагы элди тескери жакка бурганга аракет кылып жүрүшөт. Бул туурасында президент Садыр Жапаров "Кабар" маалымат агенттигине берген маегинде билдирди.
Мамлекет башчы келишимде бир эле Өзгөн районундагы жер эмес, Кыргызстан менен Өзбекстандын ортосундагы 1400 чакырымдан ашык узундуктагы чек ара тилкеси чечилип жатканын белгиледи.
"Биринчи орунда жалпы мамлекеттин кызыкчылыгы туруш керек. Чагымчылдар ушуну түшүнүп туруп эле элди тескери жака бурганга аракет жасап жүрүшөт. Канча жолу аларга түшүндүрдүк, түшүнгүсү келбейт экен. Алардын максаты эптеп эле чыр чыгарып, өлкөгө бүлүк салыш. Биз андайга жол бербейбиз. Демократия десе эле аша чаап бара жатышат. Тобо дешибиз керек. Элибиз чагымчылдарды ээрчип кетпей баарын туура түшүнүп турушат", — деди Жапаров.
Ошондой эле ал митингдерди, кечээгидей жөө жүрүштөрдү уюштурууга кайдан, кимден акча каражат алып жатышканын дагы билип турганын кошумчалады.
Белгилей кетсек, буга чейин Кемпир-Абад суу сактагчынын астындагы жердин берилишине каршы болгондор бир нече жолу митингге чыгып, социалдык тармактарда пикирлерин жазышууда. Өткөн жумада бир катар саясатчылар Өзгөнгө барып элдик курултай өткөрүшкөн.