"Эсиңиздерде болсо, былтыр эл аралык алтын сатууну уюштурган Лондондогу Баалуу металлдар базарынын ассоциациясы (LBMA) Кыргызстандын алтынын дүйнөлүк биржада сатууга чек коюп койгон. Ошол мезгилде түрк туугандар мага жана мамлекеттик аткаминерлердин кабылдамасына кире албай агама байланышкан экен (бизде бюрократия жоюла элек да). Ага "Биз сатып алалы. Бизге келип, алтын эриткен цехибизди көрүп кеткиле. Алтын сатып алууга толук мүмкүнчүлүгүбүз бар" деп кайрылышыптыр. Ошол жерге барып, алтын кармап сүрөткө түшкөн экен. Эми муну трагедия кылыштын кереги жок го дейм. Ансыз деле аларга же башка жеке булактарга бир грамм да алтын сатылган эмес. Түрк туугандардан башка он чакты мамлекеттен жогорудагыдай сунуштар түшкөн. Чамасы, бизди дүйнөлүк биржада алтыныбызды сата албай калат деп ойлошсо керек. Бирок жыл айланбай эле LBMA менен көйгөйүбүздү чечип алдык. Алтын бир жылдан бери сатылбай чогула берген. "Кыргыз алтын" аркылуу бир гана Улуттук банк сатып алып турган. Эми чектөөлөр алып салынды. Буюрса, дүйнөлүк биржада эң жогорку баа менен сатабыз", — деген Жапаров.