БИШКЕК, 25-авг. — Sputnik. "Кыргыз темир жолу" ишканасынын башкы инженери Роман Спасский Кытай — Кыргызстан — Өзбекстан темир жолун курууга сарптала турчу чыгымдар кантип бөлүштүрүлөрүн, анын болжолдуу варианттарын айтты.
Ал Sputnik Кыргызстан агенттигинин маалымат борборунда өткөн брифингде сөз сүйлөгөн.
Журналист катышуучулардан Кытай — Кыргызстан — Өзбекстан темир жолу кимдин эсебинен курула турганын сураган.
"ТЭО боюнча азырынча үч тарап бирдей үлүш бөлүп алды. Курулуш иштерин да үч тарап бирдей жүргүзөт. Ал эми темир жол курууда Кыргызстан каражатты кайдан алары азырынча белгисиз. Ал ТЭО иштери бүткөндөн кийин каралат. Азырынча бизге ылайыктуусу мамлекеттик-жеке өнөктөштүк же инвестициялык келишим", — деди башкы инженер.
Анын айтымында, темир жолдун маршруту Торугарт — Арпа — Макмал — Жалал-Абад болуп мурдагыдай калды.
Ошондой эле Спасский темир жолдун колеясындагы (дөңгөлөк жайгашчу жер) айырмачылык боюнча маселеге токтолду. Эске салсак, мурдагы СССРде темир жол колеясы 1 520 миллиметр болсо, Кытайда 1 435 миллиметрди түзөт.
"Маселе чечилип жатат, бизде бир нече вариант бар. Алдын ала айта турган болсок, Торугарттан Макмалга чейин Кытайдын чени менен келип, ал жерде кайра жүктөөчү станция болот. Биздин колея ошол жерден кетет. Эмнеге дегенде Торугарттан тарта өзүбүздүн колеяны коелу десек, кайра жүктөө станциясын бийик тоолуу аймакка салыш керек болуп калат. Климаттык көз караштан алганда Макмал көбүрөөк ылайыктуу", — деп түшүндүрдү ал.