Sputnik Кыргызстандын кабарчысы жазанын түрүн тактап беришин сураганда окуя мартта болгонун, аларга Бишкек шаардык милиция чара көргөнүн жүйөө келтирди.
"Муну март айында гана билгенбиз, биз баарын жасап койгонбуз, силер бир жума мурда эле билип алып сурап жатасыңар да. Ар бир милиция кызматкери жумушка алынып жатканда комиссиядан өтөт. Алар беш жыл мурда өткөн экен, тыкыр иликтеп жатабыз. Соттон кийин маалыматты кененирээк беребиз", — деди Ниязбеков.
Мындай окуялар дагы кайталанбашы үчүн коомчулук милиция кызматкерлерин катуу жазага тартууну талап кылып жатканын сураганда кылмыш иши жумуштан кийинки убакытта жасалган деген жообун берди.
"Милиция кызматкерлери жумуш убактысынан кийин каякка барып жатканын мага же жетекчисине айтпайт. Мисалы, үйгө деп кете берет да. Биз эми ар биринин аркасынан издеп жүрмөк белек", — деди министр.
Андан соң маалыматты Бишкек шаардык милициянын жетекчиси Азамат Ногойбаевден тактоого мүмкүнчүлүк болду.
Анын айтымында, Свердлов РИИБдин жетекчисинин коомдук коопсуздук кызматын тескеген орун басары иштен бошотулуп, дагы бир кызматкери ээлеген кызматына ылайыксыз деп табылган. Ал эми РИИБдин башчысы менен шаардык милиция бөлүмүнүн жетекчиси сөгүш алган.
Белгилей кетсек, март айында Свердлов райондук прокуратурасы эки милиционер менен бир киши 13 жаштагы кыздын зордукталышы боюнча шектелип жатканын кабарлаган. Тергөөнүн версиясы боюнча, А. Э. аттуу милиционер менен К.Н. аттуу жаран жашы жете элек кызды жыныстык катнашка барууга мажбурлаган. Кийинчерээк дагы бир милиционер колго түшкөн.
Бул иш боюнча президент Садыр Жапаров да үн катып, кылмыш жасагандарды актоого жана жазасын жеңилдетүүгө эч качан жол берилбеши керектигин айткан.
Тема боюнча: