БИШКЕК, 15-июл. — Sputnik. Мамлекеттик катчы Сүйүнбек Касмамбетов "Тамга" Аскер санаториясынын аймагында "Манас" эпосундагы аскер өнөрү" темасында өткөн эл аралык илимий-практикалык конференцияга катышты. Бул тууралуу президенттин маалымат кызматы билдирди.
Ал мамлекет башчынын "Манас" эпосунун үчилтигин ("Манас", "Семетей", "Сейтек") — ар тараптан изилдөө жана калкка жайылтуудагы кошумча чаралар жөнүндө" жарлыгын жүзөгө ашыруу максатында өткөрүлгөн.
Иш-чарага Жогорку Кеңештин депутаттары, президенттик администрациянын Кырдаал борборунун директору, министрликтердин жана ведомстволорунун, Ысык-Көл облусунун бийлик органдарынын өкүлдөрү катышкан. Ошондой эле Бишкек шаары менен Ысык-Көл облустарынын жогорку жана жалпы билим берүү мекемелеринин жетекчиликтери, ЖККУнун жана чет элдик аскер-дипломаттык корпусунун өкүлдөрү келген.
Конференциянын жүрүшүндө Айкөл Манастын образынын мисалында аскерлерди мекенди сүйүүгө тарбиялоо жана "Манас" эпосундагы аскер өнөрүн, аскердик аспектилерин изилдөө маселелери каралганын кабарлады.