БИШКЕК, 11-июл. — Sputnik. Нарын районунун Хутор-Ак-Талаа айылында К.Б. аттуу тургундун жайыт жерди мыйзамсыз тосуп алуусу боюнча Нарын облустук ИИБ тергөө иштерин жүргүзүп жатат. Бул тууралуу облустук милициядан кабарлады.
Тартип сакчылары чыр жайыт талаштан улам чыккандыгын билдирди.
Нарын районунун Хутор-Ак-Талаа айылындагы ок атуу боюнча кылмыш иши козголуп, шектүү катары үч адам камакка алынган.
"Аталган окуя боюнча кылмыш иши козголгон. Шектүү катары үч адам кармалып, экөө камалып, бирөө үй камагына алынды", — деп милиция кабарлаган.
Милиция бир нече күн мурда, тагыраагы, 7-июлдун кечинде Хутор-Ак-Талаа айылындагы жер талаштан чыккан жаңжалдан улам ок атылып, жергиликтүү алты адам жабыркагандыгын билдирген.
Милиция бул боюнча кененирээк маалымат таратты.
"Нарын районунун Ак-Талаа айылынын К.Б. аттуу тургунунун үйүнө болжол менен 40-60ка чукул айылдашы сүйлөшүү үчүн келип, дарбазасын такылдатып жаткан учурда үй ээси үйүндө сакталып турган ок атуучу куралы менен үйдүн ичинен топтошкон элди карай ок чыгарган. Чогулган эл тамды таш менен койгулап жатканда үй ээсинин бир тууган иниси Subaru Outback үлгүсүндөгү автоунаасы менен келип элди сүзө качырып айдап, үйдүн дубалын сүзүп токтогон. Өзү качып барып элди көздөй ок чыгарган. Жарым кырданып токтогон автоунааны эл оодарып салган. Андан соң автокөлүк белгисиз себептер менен өрттөнүп кеткен. Мындан соң үй ээсинин дагы бир иниси Sprinter автоунаасы менен келип, элди ары-бери сүзө качырып кубалап, аларды көздөй ок чыгарган", — деп айтылган облустук милициянын маалыматында.
Натыйжада атылган октун кесепетинен аталган айылдын алты тургуну денесинен ар кандай жаракат алып, Нарын облустук ооруканасына жеткирилген.
Милициянын билдиргенине караганда, чырдын башы 2-июлдагы окуяга такалган, алгач мушташ болуп, кийин чөп өрттөлгөн.
"2-июль күнү Ж.А. аттуу тургун менен айылдашы К.Б. бир туугандары болуп талаадан уруша кетишкен. Ж.А. жаракат алып Нарын облустук бириктирилген ооруканасынын сынык-жаракат бөлүмүнө жаткырылгандан кийин факт Нарын РИИБи тарабынан каттоого алынып, териштирүү иштери жүргүзүлүп баштаган. Ал эми эртеси күнү ооруканага түшкөн кишини сабады делген К.Б. аттуу жарандын чөбү 3-июлда өрттөнүп, ал боюнча Нарын райондук милиция териштирүү баштаган", — деп билдирди милиция.
Ал эми ок атылып, алты киши жаракат алган кырсык тирешүүнүн үчүнчү окуясы болгон. Милициядан ушул окуядан кийин эки тарап бирин-бири күнөөлөп арыз жаза баштаганын айтышты.
"Анын негизинде Кылмыш-жаза кодексинин 37-беренесин камтыган 122-берененин 2-бөлүмүнүн 1-пункту менен кылмыш иши козголду", — деп айтылган маалыматта.