Sputnik Кыргызстан агенттиги улуу инсан Дайыр Асановду сүрөт түрмөк менен эскерүүнү эп көрдү.
Генерал-майор Дайыр Асанов 1922-жылы 30-майда Нарын облусунун Ат-Башы районуна караштуу Баш-Кайыңды айылында карапайым дыйкандын үй-бүлөсүндө туулган. 1941-жылы мектепти аяктап, аскерге чакырылганга чейин колхоздо эсепчи жана мектепте мугалим болуп иштеген. Советтик армиянын катарына 1942-жылы согуштун башталышында эле кошулган.
Дайыр Асанов Сталинград фронтунда артиллериялык аткычтар полкунун 31-танкаларга каршы жеңил артиллериялык бригадасында замбирек мээлөөчү болуп, Дон, Түштүк-Чыгыш, 2-Украина жана талаа фронтторунда душман менен салгылашкан. 20 жашында замбиреги менен душмандын танкасын өрттөп, курал-жарак жүктөлгөн унаасын жок кылган. Бул үчүн "Согуштагы эрдиги үчүн" медалы менен сыйланган. 1942-жылдын 26-сентябрындагы Сталинградды душмандан бошотууда көрсөткөн эрдиги анын атын дагы бир жолу бүт өлкөгө даңазалаган.
1943-жылы 23-мартта Украинанын Харьков шаарынын алдында болгон кармашта ал болуп көрбөгөндөй эрдик көрсөткөн. Асанов сан жагынан алда канча көптүк кылган душманга каршы согуш талаасында жалгыз туруштук берген. Душмандын үч жолку танк чабуулун токтотуп, сегиз танкын, сооттолгон үч унаасын жана кырктай немец аскерин жок кылган. Төрт сааттан ашуун убакыт чегинбей душмандын мизин кайтарган жоокерге советтик бийлик жакшы баа берип Ленин ордени, Алтын жылдыз медалы менен сыйлап, Советтер Союзунун Баатыры наамын ыйгарган.
Согуштан кийин бир катар аскер комиссариатында иштеп, аскердик лицейди жетектеп, аны союздагы эң мыкты окуу жайдын катарына киргизген.
Дайыр Асанов жубайы Жамал Асанова менен 1951-жылы Жумгалда аскердик кызматта жүрүп таанышкан. Жубайлар 58 жыл чогуу жашап, төрт уулду тарбиялашкан.
Урпактардын келечеги үчүн жанын берүүдөн кайра тартпаган Дайыр Асановдун эрдиги унутулбай келет. Бишкектеги аскердик окуу жайга анын аты берилип, эстелиги тургузулуп, музейи ачылган. Дайыр Асанов 2009-жылы 18-сентябрда көз жумган.
Тема боюнча: