БИШКЕК, 25-июн. — Sputnik. Саламаттык сактоо министри Алымкадыр Бейшеналиев өтө чоң кылмыш жасабаганы белгилүү болду. Бул тууралуу президент Садыр Жапаров "Кабар" улуттук агенттигине берген маегинде билдирди.
Журналист мамлекет башчыдан баш прокурор Курманкул Зулушев кызматына кайтып, министр үй камагына чыккандан кийин коомчулукта "соодалашуу жүргөн окшойт" деген күмөн ойлор айтылып жатканын жеткирген.
"Мен кимиси менен, эмне деп соодалашам? Бир гана максат менен экөөнү тең кызматтан четтеттим. Өзүм үчүн так билип алайын деп, адилеттүүлүк үчүн комиссия түзүп, иликтөө иштерин жүргүздүрдүм. Илгери бала кезибизде бир туугандар бири-бирибиз менен уруша кетсек, атабыз экөөбүздү тең сабап, тынчытып коёр эле. Энем байкуш мага болушуп, "ай, Садырда күнөө жок болчу, күнөө тигиде, биринчи ошол баштады" десе, атам "керкисинде да бар, кемтигинде да бар" деп коёр эле. Анын сыңарындай экөөндө тең күнөө бар. Өтө эле жогорку деңгээлде күнөөгө тартып жиберчү кылмыш эмес болуп чыкты", — деди Жапаров.
Ошондой эле президент экөөнү тең эл, мамлекет деп күйгөн саясатчы катары сыпаттады.
Ошон үчүн баш прокурор кайра кызматына кайтып, саламаттыкты сактоо министринин иши тергөөнүн жыйынтыгына жараша болорун белгиледи.
Эске салсак, Башкы прокуратура саламаттык сактоо министри Алымкадыр Бейшеналиевди кармап, ага жети кылмыш ишин козгогон.
Кийинчерээк өлкө башчы Зулушевди Бейшеналиевге карата кылмыш иши тергелип бүткүчө кызматтан убактылуу четтеткен. Буга экөөнүн мамилеси себеп болгон. Эки саясатчынын чатагынын төркүнүн материалдан окуңуз.
14 күндөн кийин Бейшеналиев үй камагына чыгып, Зулушев кызматына кайткан. Ал арада президент атайын комиссия түзүп, бул жагдайды иликтеткен.