БИШКЕК, 12-июн. — Sputnik. Кыргызгидромет агенттиги алдыдагы аптага карата аба ырайынын божомолу тууралуу маалымат берди.
Ага ылайык, 12-13-июнда кээ бир райондордо батыштан соккон шамалдын ылдамдыгы секундасына 15-20 метрге жетиши мүмкүн.
Чүй облусу
12-13-июнда күндүз көпчүлүк аймактарда өткүн өтүп, күн күркүрөйт. Бийик тоолуу райондордо кар жаашы ыктымал. 14-июнда күндүз жана 15-июнда түнкүсүн жаан-чачын күтүлбөйт. 16-17-июнь күндөрү кайрадан жаан-чачындуу болот. Бийик тоолуу райондордо кар жаашы мүмкүн.
Талас облусу
12-13-июнда түнкүсүн кээ бир райондордо, күндүз көпчүлүк аймактарда өткүн өтүп, күн күркүрөшү күтүлүүдө. Бийик тоолуу райондордо кар жаайт. 14үнөн тарта 17-июнга чейин кээ бир гана райондордо өткүн өтүп, күн күркүрөйт.
Ош, Баткен жана Жалал-Абад облустары
Өлкөнүн түштүк аймактарында дагы апта жаанчыл болот. 12-июнь күнү Жалал-Абад облусунан башка аймактарда жаан жаайт. 14-июнь күнү гана үч облуста тең күн ачык болуп, башка күндөрү күндүз жер-жерлерде өткүн өтүп, күн күркүрөйт. Бийик тоолуу райондордо кар жаашы күтүлүүдө.
Ысык-Көл облусу
12-13-июнда түнкүсүн жаан-чачын болбогону менен күндүз көпчүлүк аймактарда өткүн өтүп, бийик тоолуу райондордо кар жаайт. 14-июнда башка облустардай эле жаан жаабайт. 15-июнда күндүз жана 16-17-июнда кээ бир райондордо жаан жаашы ыктымал.
Нарын облусу
Нарын облусунда дагы аптанын аягына чейин жаан көп жаайт. 14-июнда күндүз жана 15-июнда түнкүсүн жаан-чачын күтүлбөйт.