БИШКЕК, 1-июн. — Sputnik. Диетолог Евгений Арзамастцев кандай илдеттери бар кишилер чайдан баш тартышы керектигин айтты. Бул тууралуу РИА Новости агенттиги жазды.
Адистин айтымында, чай гипертония, подагра, уйкусуздук жана ашказан оорулары бар адамдарга сунушталбайт.
"Чай канчалык кызыл болсо, организмге ошончолук көп пурин заты кирет. Бул зат адамдын канында заара кычкылына айланып, бөйрөккө күч келтирет. Андыктан подагра менен ооруган адамдар чайдан баш тартып, болбосо, мала кызыл кылып ичиши керек", — деди Арзамастцев.
Ал эми чайдын курамындагы кофеин кан басымын кескин жогорулатышы мүмкүн. Андыктан гипертония диагнозу коюлган адамдар дагы чайдан оолак болгону жакшы.
"Кофеин уйкусуздуктан жапа чеккендер үчүн да пайдасыз. Ошондой эле чай ичеги-карындагы көйгөйлөрдү күчөтүшү мүмкүн", — деди диетолог.
Адис жогоруда аталган ооруларга кабылган адамдарга чай ичүү же ичпөө маселесин дарыгер менен талкуулап алышы керектигин эскертти. Организмдин өзгөчөлүгүнө жараша медиктер ар бир адамга ар башкача кеңеш бериши мүмкүн.